ਤਾਜਾ ਖਬਰਾਂ
ਸ਼ੁੱਕਰਵਾਰ ਨੂੰ ਮੈਕਸੀਕੋ ਦੇ ਦੱਖਣੀ ਅਤੇ ਕੇਂਦਰੀ ਹਿੱਸਿਆਂ ਵਿੱਚ ਇੱਕ ਸ਼ਕਤੀਸ਼ਾਲੀ ਭੂਚਾਲ ਨੇ ਵੱਡੀ ਦਹਿਸ਼ਤ ਫੈਲਾ ਦਿੱਤੀ। ਰਿਕਟਰ ਸਕੇਲ 'ਤੇ ਇਸਦੀ ਤੀਬਰਤਾ 6.4 ਮਾਪੀ ਗਈ, ਜਿਸ ਨੂੰ ਖ਼ਤਰਨਾਕ ਸ਼੍ਰੇਣੀ ਵਿੱਚ ਰੱਖਿਆ ਜਾਂਦਾ ਹੈ। ਤਾਜ਼ਾ ਜਾਣਕਾਰੀ ਅਨੁਸਾਰ, ਇਸ ਆਫ਼ਤ ਵਿੱਚ ਦੋ ਲੋਕਾਂ ਦੀ ਮੌਤ ਦੀ ਪੁਸ਼ਟੀ ਹੋਈ ਹੈ ਅਤੇ ਕਈ ਇਮਾਰਤਾਂ ਨੂੰ ਨੁਕਸਾਨ ਪਹੁੰਚਿਆ ਹੈ।
ਪ੍ਰੈੱਸ ਕਾਨਫਰੰਸ ਵਿੱਚ ਮਚੀ ਹਲਚਲ
ਭੂਚਾਲ ਦੇ ਝਟਕੇ ਉਸ ਸਮੇਂ ਮਹਿਸੂਸ ਕੀਤੇ ਗਏ, ਜਦੋਂ ਰਾਸ਼ਟਰਪਤੀ ਕਲਾਉਡੀਆ ਸ਼ੀਨਬਾਮ ਨੈਸ਼ਨਲ ਪੈਲੇਸ ਵਿੱਚ ਨਵੇਂ ਸਾਲ ਦੀ ਪਹਿਲੀ ਪ੍ਰੈੱਸ ਬ੍ਰੀਫਿੰਗ ਨੂੰ ਸੰਬੋਧਨ ਕਰ ਰਹੇ ਸਨ। ਸਥਾਨਕ ਸਮੇਂ ਅਨੁਸਾਰ ਸਵੇਰੇ 7:58 ਵਜੇ ਝਟਕੇ ਆਉਣ ਨਾਲ ਲਾਈਵ ਪ੍ਰਸਾਰਣ ਵਿੱਚ ਸਾਫ਼ ਤੌਰ 'ਤੇ ਸਾਇਰਨਾਂ ਦੀ ਆਵਾਜ਼ ਗੂੰਜਣ ਲੱਗੀ ਅਤੇ ਕੈਮਰਿਆਂ ਵਿੱਚ ਕੰਬਣੀ ਦਿਖਾਈ ਦਿੱਤੀ।
ਰਾਸ਼ਟਰਪਤੀ ਨੇ ਦਿਖਾਈ ਹਿੰਮਤ: ਸਥਿਤੀ ਦੀ ਗੰਭੀਰਤਾ ਨੂੰ ਭਾਂਪਦਿਆਂ, ਰਾਸ਼ਟਰਪਤੀ ਸ਼ੀਨਬਾਮ ਨੇ ਸ਼ਾਂਤ ਰਹਿ ਕੇ ਤੁਰੰਤ ਸਾਰਿਆਂ ਨੂੰ ਇਮਾਰਤ ਖਾਲੀ ਕਰਨ ਦਾ ਸੰਕੇਤ ਦਿੱਤਾ। ਉਹ ਖੁਦ ਵੀ ਪੱਤਰਕਾਰਾਂ ਨਾਲ ਸੁਰੱਖਿਅਤ ਬਾਹਰ ਨਿਕਲ ਗਏ। ਹਾਲਾਤ ਆਮ ਹੋਣ 'ਤੇ, ਉਨ੍ਹਾਂ ਨੇ ਮੁੜ ਪੱਤਰਕਾਰਾਂ ਨੂੰ ਸੰਬੋਧਨ ਕੀਤਾ।
ਗੁਰੇਰੋ ਰਿਹਾ ਭੂਚਾਲ ਦਾ ਕੇਂਦਰ
ਰਾਸ਼ਟਰੀ ਭੂਚਾਲੀ ਸੇਵਾ (NCS) ਅਨੁਸਾਰ, ਭੂਚਾਲ ਦਾ ਕੇਂਦਰ ਦੱਖਣੀ ਰਾਜ ਗੁਰੇਰੋ ਦੇ ਸਾਨ ਮਾਰਕੋਸ ਖੇਤਰ ਦੇ ਨੇੜੇ ਸੀ। ਇਹ ਇਲਾਕਾ ਪ੍ਰਸ਼ਾਂਤ ਤੱਟ 'ਤੇ ਸਥਿਤ ਮਸ਼ਹੂਰ ਸੈਰ-ਸਪਾਟਾ ਸਥਾਨ ਅਕਾਪੁਲਕੋ ਤੋਂ ਜ਼ਿਆਦਾ ਦੂਰ ਨਹੀਂ ਹੈ। ਭੂਚਾਲ ਦੀ ਡੂੰਘਾਈ ਲਗਭਗ 6.21 ਮੀਲ ਦੱਸੀ ਗਈ।
USGS ਰਿਪੋਰਟ: ਅਮਰੀਕੀ ਭੂ-ਵਿਗਿਆਨਕ ਸਰਵੇਖਣ (USGS) ਨੇ ਭੂਚਾਲ ਦਾ ਕੇਂਦਰ ਰੈਂਚੋ ਵੀਏਜੋ ਇਲਾਕੇ ਦੇ ਹੇਠਾਂ ਕਰੀਬ 35 ਕਿਲੋਮੀਟਰ ਦੀ ਡੂੰਘਾਈ ਵਿੱਚ ਦੱਸਿਆ ਹੈ।
500 ਤੋਂ ਵੱਧ ਆਫਟਰਸ਼ੌਕਸ: ਇਸ ਮਜ਼ਬੂਤ ਝਟਕੇ ਤੋਂ ਬਾਅਦ 500 ਤੋਂ ਵੱਧ ਛੋਟੇ ਆਫਟਰਸ਼ੌਕਸ ਦਰਜ ਕੀਤੇ ਗਏ ਹਨ, ਜਿਸ ਕਾਰਨ ਲੋਕਾਂ ਦੀ ਚਿੰਤਾ ਵਧ ਗਈ ਹੈ।
ਦੋ ਮੌਤਾਂ ਦੀ ਪੁਸ਼ਟੀ, ਹਸਪਤਾਲ ਨੂੰ ਨੁਕਸਾਨ
ਇਸ ਆਫ਼ਤ ਵਿੱਚ ਦੋ ਮੌਤਾਂ ਹੋਈਆਂ ਹਨ। ਗੁਰੇਰੋ ਦੀ ਗਵਰਨਰ ਐਵਲਿਨ ਸਾਲਗਾਡੋ ਨੇ ਦੱਸਿਆ ਕਿ ਭੂਚਾਲ ਦੇ ਕੇਂਦਰ ਨੇੜਲੇ ਇੱਕ ਪਿੰਡ ਵਿੱਚ ਘਰ ਢਹਿਣ ਕਾਰਨ ਇੱਕ 50 ਸਾਲਾ ਔਰਤ ਦੀ ਮੌਤ ਹੋ ਗਈ।
ਦੂਜੀ ਮੌਤ ਮੈਕਸੀਕੋ ਸਿਟੀ ਵਿੱਚ ਦਰਜ ਕੀਤੀ ਗਈ। ਮੇਅਰ ਕਲਾਰਾ ਬਰੂਗਾਡਾ ਨੇ ਦੱਸਿਆ ਕਿ ਇੱਕ ਵਿਅਕਤੀ ਦੀ ਮੌਤ ਇਮਾਰਤ ਖਾਲੀ ਕਰਦੇ ਸਮੇਂ ਡਿੱਗਣ ਕਾਰਨ ਹੋਈ, ਜਦੋਂ ਉਸ ਨੂੰ ਅਚਾਨਕ ਗੰਭੀਰ ਡਾਕਟਰੀ ਸਮੱਸਿਆ ਆ ਗਈ।
ਵੱਡਾ ਨੁਕਸਾਨ:
ਗੁਰੇਰੋ ਦੀ ਰਾਜਧਾਨੀ ਚਿਲਪਾਨਸਿੰਗੋ ਵਿੱਚ ਇੱਕ ਹਸਪਤਾਲ ਨੂੰ ਭਾਰੀ ਨੁਕਸਾਨ ਪਹੁੰਚਿਆ, ਜਿਸ ਕਾਰਨ ਮਰੀਜ਼ਾਂ ਨੂੰ ਸੁਰੱਖਿਅਤ ਥਾਵਾਂ 'ਤੇ ਸ਼ਿਫਟ ਕਰਨਾ ਪਿਆ।
ਗੁਰੇਰੋ ਵਿੱਚ ਕਈ ਥਾਵਾਂ 'ਤੇ ਭੂ-ਖਿਸਕਣ ਹੋਇਆ, ਜਿਸ ਨਾਲ ਮੁੱਖ ਹਾਈਵੇਅ ਨੂੰ ਵੀ ਨੁਕਸਾਨ ਪਹੁੰਚਿਆ ਹੈ।
ਮੈਕਸੀਕੋ ਸਿਟੀ ਦੇ ਹਸਪਤਾਲ 'ਲਾ ਰਾਸਾ' ਦੇ ਪਾਰਕਿੰਗ ਖੇਤਰ ਦੀ ਛੱਤ ਦੇ ਕੁਝ ਹਿੱਸੇ ਡਿੱਗਣ ਦੀ ਵੀ ਖ਼ਬਰ ਹੈ।
ਮੈਕਸੀਕੋ ਸਿਟੀ, ਅਕਾਪੁਲਕੋ ਅਤੇ ਆਸ-ਪਾਸ ਦੇ ਸ਼ਹਿਰਾਂ ਵਿੱਚ ਤੇਜ਼ ਝਟਕਿਆਂ ਕਾਰਨ ਲੋਕ ਘਬਰਾ ਕੇ ਘਰਾਂ ਅਤੇ ਦਫ਼ਤਰਾਂ ਤੋਂ ਬਾਹਰ ਨਿਕਲ ਆਏ। ਪ੍ਰਸ਼ਾਸਨ ਨੇ ਸਥਿਤੀ 'ਤੇ ਨਜ਼ਰ ਰੱਖਣ ਲਈ ਚੌਕਸੀ ਵਧਾ ਦਿੱਤੀ ਹੈ।
Get all latest content delivered to your email a few times a month.
